المشاركات
لا تنسى ترك تعليق تحفيزي
أحبهم ما أملهم ولا احمل جفاهم
راحو يگلبي گرب موتك وراهم
راحو مايرجعون * * شفتهم شوف العيون
ياگـلب بعيوني چانوا
عمر عيد اتفارگينه
هسه طيحة دمع طاحوا
ويـا دمع رد اعله عينه
مدري صدفة العمر خلص
مدري طيف وفتشينه
الـ كون ماتنفع يگلبي
هذا متأخر حچينه
يا گلبي العشگ مات * * شتفيد الحرامات
نسوني ابدنيه دخان خـذوا نسمـة هواهم
________________________
أحبهم ما أملهم ولا احمل جفاهم
راحو يگلبي گرب موتك وراهم
راحو مايرجعون * * شفتهم شوف العيون
__________________________
يا گلب لا ترتجيهم
عشگـو اخواني المنيه
احسين من راح التفت لي
واعرفت مـامنه جـيه
موت والحگهم يگلبي
ليش اظل افرگ بـديـه
انه اركض وانته تركض
ياگلب زينـب خطيه
تدگ ماتدگ ميتين * * اوگف والحگ احسين
يگلبي اشيحمل الليل ولا نجمه ابسماهم
________________________
احبهم ما أملهم ولا أحمل جفاهم
راحو يگلبي گرب موتك وراهم
راحو مايرجعون * * شفتهم شوف العيون
________________________
كافي لاتعتب يگلبي
ماكو واحد تشتكيله
نوگ ناخت واهلي نومه
وراح تبعد ليله ليله
اشما مشينه ايزيد ضيمك
سفرتك كلش طويله
موت واسترني يگلبي
ابديرة تكره طاري شيله
عليك العافني وراح * * موت وخلني ارتاح
يگلبي ابشحة النور رخص كلش ضواهم
________________________
احبهم ما أملهم ولا أحمل جفاهم
راحو يگلبي گرب موتك وراهم
راحو مايرجعون * * شفتهم شوف العيون
________________________
هاي هم تتسمه ليله
بيها بت حيدر سبيه
ليله بيها الشرف غلطه
وبيها زينب خارجيه
خيمه الوذن بيها ماكو
وگوم هـدو ميه ميه
اشلون ألم الحرم باچر
وإحنه كل وحده ابـنويـه
باچر ماهو عباس * * كلما التفت ناس
رفت راية العار عگب طيحة لواهم
________________________
احبهم ما أملهم ولا أحمل جفاهم
راحو يگلبي گرب موتك وراهم
راحو مايرجعون * * شفتهم شوف العيون
________________________
باچر امشي ابلا محامل
وراية ماكو ولا عشيره
ناگتي هزله وتخوف
حته مو مالت أسيره
حيره اظلن حيره أصعد
أحچي حيره السكته حيره
الـذلـة لو عثرة الناگه
وطيحتي كلش چبيره
يگلبي اگبال العيون * * ترضه طيحة أم عون
عَلـّـي ما يلحگ الموت أحب موت الخذاهم
________________________
احبهم ما أملهم ولا أحمل جفاهم
راحو يگلبي گرب موتك وراهم
راحو مايرجعون * * شفتهم شوف العيون
________________________
۞اداء:- سيد فاقد الموسوي
۞الشاعر:- احمـد المشـرفـاوي
